प्रधानमन्त्री ओली न्युयोर्कमा: आज राष्ट्रसंघका महासचिव गुटेरससँग भेटवार्ता गर्ने, भारतीय समकक्षी मोदीसँग साइडलाइनमा भेट हुने

न्युयोर्क (अमेरिका) – संयुक्त राष्ट्र संघको ७९औं महासभामा भाग लिन नेपाली प्रतिनिधिमण्डलको नेतृत्व गर्दै प्रधानमन्त्री केपी शर्मा ओली स्थानीय समय अनुसार शुक्रबार राति न्युयोर्क आइपुग्नुभएको छ।

प्रधानमन्त्री ओलीलाई जेएफके अन्तर्राष्ट्रिय विमानस्थलमा राष्ट्र संघका लागि स्थायी नियोग प्रमुख लोकबहादुर थापा, अमेरिकाका लागि कार्यवाहक राजदूत कुमार खरेल र स्थायी नियोगका अन्य उच्च अधिकारीहरुले अत्यन्त सम्मानपूर्वक स्वागत गरेका थिए। प्रधानमन्त्री ओलीले आगामी असोज १० गते संयुक्त राष्ट्र संघको महासभामा नेपालको तर्फबाट महत्वपूर्ण सम्बोधन गर्नु हुनेछ।

महासभामा “कोही पनि पछाडि नछाडिने” भन्ने सन्देशसहित, वर्तमान र भावी पुस्ताका लागि शान्ति, दिगो विकास, र मानव अधिकारलाई प्रवर्द्धन गर्न सबैले मिलेर अघि बढ्नुपर्ने विषयमा गहन बहस हुनेछ। यसै क्रममा, प्रधानमन्त्री ओलीले यहाँस्थित नेपाली समुदायले आयोजना गर्ने कार्यक्रममा आइतबार सम्बोधन गर्नु हुनेछ, जहाँ उनले राष्ट्र निर्माण र प्रजातान्त्रिक यात्राका चुनौती र अवसरबारे विचार आदानप्रदान गर्नु हुनेछ।

महासभामा सहभागी विभिन्न मित्रराष्ट्रका प्रतिनिधिहरूसँग प्रधानमन्त्री ओलीले साइडलाइन बैठकहरू पनि गर्ने कार्यक्रम रहेको छ। यस क्रममा, उहाँले अति कम विकसित देशहरूको अध्यक्षको हैसियतमा सम्बोधन गर्ने विशेष अवसर पनि पाउनेछन्। साथै, कोलम्बिया विश्वविद्यालय र हावर्ड विश्वविद्यालयमा नेपालले प्रजातन्त्र, आर्थिक समृद्धि, र न्यायिक प्रणालीमा गरेको प्रगति तथा जलवायु न्यायको परिप्रेक्ष्यमा आफ्ना विचार प्रस्तुत गर्ने कार्यक्रम छ।

प्रधानमन्त्री ओलीले आज संयुक्त राष्ट्र संघका महासचिव एन्टोनियो गुटेरससँग उच्चस्तरीय भेटवार्ता गर्नु हुनेछ। यस्तै, ग्लासहाउस फर पार्लियामेन्ट फोरममा उहाँले फोसिल फ्युलसम्बन्धी कार्यक्रममा प्रमुख वक्ताको रूपमा सम्बोधन गर्ने कार्यतालिका रहेको छ।

प्रधानमन्त्री ओलीको सम्मानमा आज संयुक्त राष्ट्र संघका स्थायी प्रतिनिधिले स्वागत समारोहको आयोजना गर्नेछन्, जसले नेपाली नेतृत्वलाई अन्तर्राष्ट्रिय मञ्चमा सम्मानित ढंगले प्रस्तुत गर्ने अवसर प्रदान गर्नेछ।

यसै क्रममा, भारतीय प्रधानमन्त्री नरेन्द्र मोदीसँग प्रधानमन्त्री ओलीको द्विपक्षीय साइडलाइन भेटवार्ता तय भएको छ। नेपालले केही समयअघि नै भेटवार्ताको प्रस्ताव राखेको भए पनि नयाँ दिल्लीबाट सकारात्मक जवाफ प्राप्त भएको थिएन। तर, ओली न्युयोर्क उत्रनु केही अघि भारतीय पक्षले भेटवार्ताको लागि तयार रहेको जानकारी दिएको हो। आइतबार दुई नेताहरूबीच पहिलोपटक चौथो कार्यकालमा द्विपक्षीय भेटवार्ता हुनेछ, जसका लागि आवश्यक तयारी नेपाली पक्षबाट गरिसकिएको छ।