अख्तियारको प्रतिवेदनः एक हजार पाँच सय ५४ प्रतिवादी, आठ अर्ब ४० करोडभन्दा बढी माग दाबी
काठमाडौँ- अख्तियार दुरुपयोग अनुसन्धान आयोगले गएको वर्षभरि १,५५४ जनालाई प्रतिवादी बनाउँदै मुद्दा दायर गरेको छ। ती प्रतिवादीहरूमाथि ८ अर्ब ४० करोड ६ लाख ४९ हजार ४०७ रूपैयाँ बिगो माग गरिएको छ।
आयोगले आर्थिक वर्ष २०८०/८१ मा २०१ वटा मुद्दा विशेष अदालतमा दर्ता गर्यो, जसमा ५८ गैरकानुनी लाभ, ४८ घूस, ३४ नक्कली शैक्षिक प्रमाणपत्र, ३३ सार्वजनिक सम्पत्तिको क्षति, १३ राजस्व चुहावट, ११ गैरकानुनी सम्पत्ति आर्जन र ४ अन्य मुद्दाहरू छन्।
आयोगका प्रमुख आयुक्त प्रेमकुमार राईले राष्ट्रपति रामचन्द्र पौडेलसमक्ष आयोगको ३४औँ वार्षिक प्रतिवेदन पेश गरेका थिए। आयोगले टङ्गाल र अन्य कार्यालयहरूबाट कार्य सञ्चालन गरिरहेको छ, जसमा ९९० कर्मचारी कार्यरत छन्। साथै, आयोगले ३३ जिल्लाका प्रमुख जिल्ला अधिकारीहरूलाई अनुसन्धानको अधिकार प्रत्यायोजन गरेको छ।
आर्थिक वर्ष २०८०/८१ मा आयोगले २६,९१८ उजुरी प्राप्त गरेको थियो, अघिल्लो वर्षबाट सरेका ९,२६८ उजुरीसमेत गरेर कुल ३६,१८६ उजुरी भएको छ। तीमध्ये २७,७१४ उजुरी स्क्रिनिङ र प्रारम्भिक छानबिनबाट टुंग्याइएको छ। सबैभन्दा धेरै उजुरी संघीय मामिला (स्थानीय तहसमेत) सम्बन्धित ३८.९१ प्रतिशत रहेको छ।
अन्य उजुरी शिक्षा, गैरकानुनी सम्पत्ति, भूमि प्रशासन, नक्कली शैक्षिक प्रमाणपत्र, वन तथा वातावरण, स्वास्थ्य, भौतिक पूर्वाधार, गृह प्रशासन र अर्थतन्त्रसँग सम्बन्धित छन्।
आयोगले विस्तृत अनुसन्धान गरी २०१ मुद्दा दर्ता गरेको छ, जसमा ५२० सरकारी कर्मचारी, १०६ निर्वाचित जनप्रतिनिधि, १४८ मनोनीत पदाधिकारी र अन्य ७३९ जनालाई प्रतिवादी बनाइएको छ।
